27. oktober 2000 UKA 2000 / 23
A l l a n n g u u t i s s a t u t s i u n n e r s u u t
uunga
Takornariartitsinermik inuussutissarsiuteqarnermut aningaasalersuinikkut tapersiisarneq pillugu Inatsisartut inatsisaata allanngortinneqarneranik Inatsisartut inatsisissaattut siunnersuut
Aappassaaneerinninnermut Naalakkersuisunit saqqummiunneqartoq.
§ 1-imi
1. Nr. 1-imi § 2, imm. 1 ima oqaasertalerneqassaaq:
"Aningaasaateqarfimmik takornariat unnuiffigisinnaasaannik pilersitsinermut aningaasalersuinikkut tapersiisartussamik Naalakkersuisut pilersitsissapput. Aningaasaateqarfiup aqqa malittarisassaalu Naalakkersuisut aalajangersassavaat, taamaattorli imm. 4 aamma § 3 takukkit. Aningaasaateqarfiup malittarisassai allanngortinneqarsinnaapput aningaasaateqarfik takornariat unnuiffigisinnaasaannik pilersitsinermut, alliliinernut nutarterinernullu aningaasalersuinikkut tapersiisinnaanngorlugu, kiisalu suliassaqarfimmi periarfissanik misissuisinnaanngortillugu nutaanillu suliuteqarsinnaalersillugu. Aningaasaateqarfiup malittarisassaani allannguutit Naalakkersuisunit akuerineqartassapput."2. Nr. 7 ima oqaasertalerneqassaaq:
"§ 7. Suliamut taaneqartumut aningaasaliissutinut tamarmiusunut annerpaamik 40%-ii inatsit manna naapertorlugu aningaasalersuutitut taarsigassarsiaritinneqarsinnaapput, tak. § 2, imm. 1. Taarsigassarsiarititat amerlassusiisa procentiisa annertussusiannut suliat ataasiakkaat akilersinnaassusiat kiisalu allanit aningaasalersorneqarsinnaassusiat apeqqutaassaaq. Taarsigassarsiarititat taaneqartut ikinnerpaamik 50%-ii taarsigassarsiatut ernialittut tunniunneqassapput. Taarsigassarsiat erniaqaratillu taarsersugassaanngitsut akuleriissitat, taarsigassarsiat erniallit kiisalu aningaasaateqarfiup qularnaveeqqusiineratigut taarsigassarsiat tammarnaveeqquserneqarneranni piumasaqaatigineqartutullu tulleriiaarneqarneranni imm. 2-4-mi piumasaqaatigineqartut malinneqassapput.
Imm. 2. Taarsigassarsiat ukiuni qulini akilersorneqassapput. Taarsigassarsiat erniaqaratillu taarsersuutitaqanngitsut aallaqqaammut amerlassusiisa 10%-ii taarsigassarsiat tunniunneqarnerinit qaammatit 12-ikkaarlugit nalikillilerneqartassapput.
Imm. 3. Taarsigassarsiarititat ernialersukkat erniaqartinneqarput ernialiunneqartartup diskontup qaqugukkulluunniit annertoqataanik, aningaasaateqarfiup tapiliussatut aalajangiussaanik qallerlugu, taamaattorli annerpaamik 2%-imik ilallugu.
Imm. 4. Aningaasaateqarfiup taarsigassarsisitsinera unnuisarfimmik aningaasaliiffigisamik qularnaveeqqusiinikkut isumannaarneqassaaq. Qularnaveeqqusiussaq sapinngisamik pitsaanerpaamik salliutinneqassaaq, taamaattorli aningaasaliissutit allat akueralugit aningaasiliissutit katillutik 40%-iinik amerlassusillit tikillugit, imm. 1-imi taaneqartut. Qularnaveeqqusiussaq taarsigassarsisitsisup sallinnguukkiartuaartussatut qalarnaveeqqusiiffigineratut issanngilaq.
Imm. 5. Taamaallaat qularnaveeqqusiiffigineqarsinnaapput aningaaserivinnit pisortanit nakkutigineqartunit taarsigassarsiat imaluunniit akiliutigeriaannagassatut atukkiussat. Taarsigassarsiat amerlanerpaamik 50%-ii qularnaveeqqusiiffigineqarsinnaapput.
Imm. 6. Qularnaveeqqutinik akiliisussatut Nunatta karsiata pisussaaffii tassaassapput missingersorlugit taarsigassarsiat sinneruttut amerlaqataat, aningaasat qularnaveeqquserneqartut aallaqqaammut taarsigassarsiarineqartut amerlassusaannut naleqqiussat."
Nassuiaatit
Paasissutissat Inatsisartut Inatsisileriffiannit pissarsiarineqartut Inatsisartullu siullermeerinninnerat tunngavigalugit allannguutissatut siunnersuut saqqummiunneqarpoq.
Nr. 1-imut
1 pillugu.
Aningaasaateqarfiup siunertaanik allanngortitsinerit malittarisassat allanngortinneqarnerinik kinguneqartarput, tamatuma kingorna Aningaasaateqarfeqarnermut oqartussaasunit akuerineqartussanik. Pissusissamisoortutut isigineqanngimmat inatsisikkut siunertanik allanngortitsisarnissaq, tamatuma kingorna malittarisassanik allanngortitsinermik Aningaasaateqarfeqarnermullu oqartussaasunit akuerineqarnermik malitseqartunik, siunnersuut allanngortinneqarpoq siunertat allanngortinneqarsinnaasunngorlugit. Taamaalilluni aningaasaateqarfiup siulersuisuisa inatsisissatut siunnersuutip akuersissutigineqarnerata kingorna namminneq suliniuteqarnermikkut imaluunniit Naalakkersuisut inassuteqarnerisigut malittarisassat allanngortissinnaalissavaat. Taamaattorli § 2, imm. 4, oqaaseqatigiit sisamaat naapertorlugu malittarisassanik allanngortitsineq Naalakkersuisut tamatigut akuerisartussaavaat.
2 pillugu.
Allanngortitsineq imarisaanik allanngortitsinngilaq. Imarisaasa qanoq paasineqarnissaat imm. 1-imi erseqqissarneqarpoq, imm. 2-mut innersuussineq imm. 2-miit 4-mut innersuussininngortinneqarluni. Imm. 4-mi imarisaani kukkunernik iluarsiisoqarpoq. Iluarsiissutip imarivaa oqaaseq "aningaasartuutit" allanngortinneqarmat imatut nipilerlugu "aningaasaliissutit", kiisalu innersuut § 6, imm. 1. imaassammat imm. 1-imi taaneqartut.